Esida, thashetheme për Valerin: “Ai, motra e shtëpisë, më nervozon”

Disa nga banorët qëndrojnë në oborr, në ambientin afër pishinës, teksa shkëmbejnë biseda të ndryshme e bëjnë shaka me njëri-tjetrin. Esida i tregon Meridianit dhe banorëve të tjerë në oborr për diskutimin që ka pasur me Esterinën dhe Valerin si edhe për fjalorin e ulët që ka përdorur me të, ndërsa tallet me fjalët e Esterinës. Meridiani qesh, duke i dalë në krah e duke vazhduar të bëjë ironi me fjalët e saj.

Më vonë Esida shkon në dhomën e gjumit, ku është shtrirë Viola, dhe i shpreh asaj shqetësimin pas diskutimit me Valerin, duke u shprehur: “U bë ai, motra e shtëpisë, me acaron nervat që në mëngjes se e di që unë jam me nerva”. Ndërsa Viola mundohet të ndërrojë bisedë, për të mos e vazhduar më atë diskutim, por më kot, pasi Esida vazhdon ende të flasë për të. “Çfarë ke me Valerin ti?”, i thotë më në fund Violeta. Esida shprehet duke thënë se Valeri kërkon të ketë afër tij një person që ta përdorë dhe ta bëjë të ndihet keq dhe i vjen inat që ajo ka krijuar një marrëdhënie të mirë me të gjithë banorët brenda shtëpisë.

Rigelsi: “U zbulua lidhja mes dy banorëve”; Fatjoni e Meridiani, thashetheme për Valerin

Rigelsi, del në oborr, ku ndodhet Meridiani dhe Enkelejdi, të cilët janë shtrirë në shezlong dhe shijojnë rrezet e diellit. Ai fillon të bisedojë me ta e t’u tregojë rreth ngjarjeve në shtëpi gjatë natës dhe mëngjesit të sotëm. 

Rigelsi tregon se vajzat e shtëpisë kanë dashur të bëjnë një lojë, por kanë rënë pre e provokimeve të veta, pasi mendon se Juliana ka zbuluar pa dashje lidhjen e saj me Arditin, ndërsa Matilda është ndarë me Fatjonin vetëm pasi ka dashur të bëjë një lojë me të. 

Ndërsa Mikela, e cila shkon aty dhe e dëgjon, i thotë që të mos krijojë dyshime të tilla, pasi Juliana dhe Arditi do të ishin shumë të kujdesshëm nëse vërtet do të kishin një lidhje. “Nuk e di, do ta marrim vesh të premten”, thotë Rigelsi duke mbyllur diskutimin. 

Fatjoni dhe Meridiani ndodhen në kuzhinë dhe ndërkohë që Meridiani është duke larë enët, fillojnë të bëjnë thashetheme për Valerin. Fatjoni mendon se Valeri e ka kuptuar lidhjen e tij me Matildën, pasi i ka parë një ditë duke debatuar dhe Fatjoni i ka kërkuar që këtë gjë të mos e diskutonte me askënd tjetër, por ai ka folur, edhe pas kërkesës së tij. Ndërsa Meridiani shprehet duke thënë se ai ende nuk e ka njohur Valerin, i cili sipas tij, është duke bërë lojë me të gjithë. 

Ndërsa flasin për nominimet, Meridiani mendon se Valeri dhe grupi i tij s’mund të bëjnë dot asgjë, pasi janë një grup shumë i vogël dhe se Valeri është shumë fals, gjë që publiku e ka kuptuar, sipas tij. 

Violeta: “S’jam e fejuar, as e martuar; Kam ardhur të gjej burrë”

Enkelejdi dhe Violeta fillojnë të shkëmbejnë biseda me njëri-tjetrin, ndërkohë që banorët e tjerë vazhdojnë të jenë ende në gjumë.
Violeta është duke gatuar kotëleta për të gjithë banorët, ndërsa Enkelejdi që i rri afër,
e pyet për statusin e saj. Violeta i tregon se është beqare. “Nuk jam as e fejuar, as e martuar. Kam ardhur të gjej burrë”, thotë ajo duke qeshur.

Ai e pyet rreth ngjarjeve që ndodhën gjatë natës dhe Violeta fillon t’i tregojë për lojën që i kanë bërë banorët Rigelsit, ku Juliana është shtirur si e dashura e Arditit dhe ky i fundit gjoja është bërë xheloz për afrimitetin që ka krijuar Juliana me Rigelsin. “Mua m’u duk sikur po ziheshin”, thotë Enkelejdi, i cili ka qenë në gjumë.

Pak më vonë ata dalin sërish në oborr dhe vazhdojnë të kërcejnë me Valerin nën tingujt e muzikës në sfond, ndërkohë që të gjithë banorët e tjerë janë ende duke fjetur.

Diskutim ironik mes Esidës dhe Esterinës

Valeri, Esida, Esterina dhe Violeta dalin në oborr dhe fillojnë të shkëmbejnë biseda me njëri-tjetrin, duke marrë shkas nga loja që kanë bërë banorët mbrëmë dhe qëndrimi zgjuar deri në orët e para të mëngjesit.

Ndërsa janë duke diskutuar, mes Esidës dhe Valerit fillon një ironi, në të cilën përfshihet edhe Esterina, duke u bërë palë me Valerin kundër Esidës.
Siç dihet, vajzat nuk kanë shkuar mirë bashkë që në ditët e para të qëndrimit në Big Brother dhe vazhdimisht thumbojnë njëra-tjetrën, por ajo që bëhet shkak për zënkat mes të dyjave, si gjithmonë, është Esida. Ajo flet me superlativa për veten dhe i thotë se Esterina nuk është askush për të në shtëpi. Ndërsa Esterina e justifikon veten me moshën e saj të vogël, teksa i kujton se ajo ka bërë gabime të pafalshme dhe nuk mund të flasë asgjë kundër banorëve të tjerë.
Diskutimi mes tyre arrin nderi në ofendime kundrejt njëra-tjetrës, me gjithë përpjekjet e Violetës për t’i qetësuar.

Diskutimi i dy vajzave përfundon vetëm pasi Esterina vendos të largohet nga oborri. Ndërsa disa nga banorët vazhdojnë ende të jenë në gjumë.

Gjendja e Meridianit pas leximit të zarfit

Gjendja e Meridianit u vështirësua së tepërmi, pas komunikimit nga Vëllai i Madh. Ai u shtri menjëherë në krevat, duke mbuluar kokën me jastëk dhe nuk komunikoi me njeri. Esida, e cila ishte shtrirë në krevatin ngjitur, rrinte e heshtur, ndërkohë qe Mikela i fliste në lidhje me gatimin, pasi ai ishte i vetmi që gatuante në shtëpi dhe kjo është e padrejtë sipas saj.

Gjendja e Meridianit duket se vështirësohet edhe më. Ai vazhdon të qëndrojë shtrirë, duke mos dashur të shohë askënd në sy. Mikela dhe Esida që ndodhen në të njëjtën dhomë, janë po aq të shokuara nga komunikimi, duke mos gjetur dot fjalë për ta qetësuar. Ato qëndrojnë në heshtje pa komunikuar asnjë fjalë mes tyre. Meridiani merr frymë thellë dhe vendos të flasë: “Po më streson pritja” - thote ai, duke iu kthyer sërish qetësisë dhe heshtjes që ka pllakosur në dhomë.

Juliana për ish të dashurin...

Juliana në oborr bisedon me Fatjonin dhe Valerin për një lidhje të shkuar, e përfunduar pasi ai e kishte tradhëtuar me shoqen e saj të ngushtë. Ajo nis të tregojë detaje se si arriti ta zbulonte dhe se si ai nuk e pranoi asnjëherë. 

Valeri e pyet se si e mori vesh. Ajo u tregon se si fillim, dyshonte shumë tek sjellja e tij, pasi ai nuk e merrte më me vete kur dilnin, siç bënte zakonisht dhe kjo i ngriti hije dyshimi. Më pas, ishte shoku i ngushtë që i tregoi gjithçka. Ajo rrëfen se ka vuajtur shumë prej kësaj dhe se e ka përjetuar shumë keq. 

Megjithëse provuan të qëndronin bashkë pas kësaj, ajo tregon se nuk mundi më, pasi nuk kishte më besim tek ai dhe se nuk e fali dot, duke i dhënë fund.